ഡോർട്ട്മുണ്ട്: അപ്രതീക്ഷിത സെൽഫ് ഗോളുകളും ട്വിസ്റ്റുകളും നിറഞ്ഞ ത്രില്ലർ പോരാട്ടത്തിൽ വിയ്യാറയലിനെതിരെ ബൊറൂസിയ ഡോർട്ട്മുണ്ടിന് ആവേശ ജയം. യുവേഫ ചാമ്പ്യൻസ് ലീഗിൽ നടന്ന മത്സരത്തിൽ രണ്ടിനെതിരെ മൂന്ന് ഗോളുകൾക്കാണ് ജർമൻ കരുത്തരായ ഡോർട്ട്മുണ്ട് സ്പാനിഷ് ക്ലബ്ബിനെ കീഴടക്കിയത്.
ഗോൾരഹിതമായ ആദ്യപകുതിക്കു ശേഷം രണ്ടാം പകുതിയിലാണ് മത്സരത്തിലെ അഞ്ച് ഗോളുകളും പിറന്നത്. 53-ാം മിനിറ്റിൽ വിയ്യാറയൽ താരം റെനറ്റോ വീഗ വഴങ്ങിയ സെൽഫ് ഗോളിലൂടെ ഡോർട്ട്മുണ്ട് മുന്നിലെത്തി (1-0). എന്നാൽ 66-ാം മിനിറ്റിൽ സാന്റിയാഗോ മൊറീന്യോ നേടിയ ഗോളിലൂടെ വിയ്യാറയൽ ഒപ്പമെത്തി (1-1).
തുടർന്ന് ഡോർട്ട്മുണ്ടിനായി ഇരട്ടഗോളുകളുമായി തിളങ്ങിയ സെർഹൗ ഗുരാസി കളിയുടെ നിയന്ത്രണം ഏറ്റെടുത്തു. 80-ാം മിനിറ്റിൽ മികച്ചൊരു ഫിനിഷിംഗിലൂടെ ഡോർട്ട്മുണ്ടിന് വീണ്ടും ലീഡ് സമ്മാനിച്ച (2-1) ഗുരാസി, 85-ാം മിനിറ്റിൽ ലഭിച്ച പെനാൽറ്റി കൃത്യമായി വലയിലെത്തിച്ച് ടീമിന്റെ ലീഡ് 3-1 ആയി ഉയർത്തി. എന്നാൽ ഇഞ്ചുറി ടൈമിൽ (90+3′) സെർഹൗ ഗുരാസിയുടെ പിഴവിൽ നിന്ന് പിറന്ന അവിചാരിതമായ സെൽഫ് ഗോൾ വിയ്യാറയലിന് രണ്ടാം ഗോൾ സമ്മാനിച്ചെങ്കിലും (3-2), ഒടുവിൽ ഡോർട്ട്മുണ്ട് വിജയം ഉറപ്പിക്കുകയായിരുന്നു.
Content Highlights:
Borussia Dortmund secured a thrilling 3-2 victory over Villarreal in the UEFA Champions League. Serhou Guirassy scored a crucial brace in the second half after an early own goal. A late own goal by Guirassy set up a tense finish before Dortmund held on for the win.






