ചിക്കാഗോ: അമേരിക്കൻ മേജർ ലീഗ് സോക്കറിൽ (MLS) ചിക്കാഗോ ഫയറും ഇന്റർ മിയാമിയും തമ്മിൽ നടന്ന ആവേശകരമായ മത്സരത്തിനിടെ പോളിഷ് സ്ട്രൈക്കർ റോബർട്ട് ലെവൻഡോസ്കിയും അർജന്റീന താരം റോഡ്രിഗോ ഡിപോളും തമ്മിൽ നാടകീയമായ വാഗ്വാദം. കളിക്കളത്തിലെ വീറും വാശിയും അതിരുവിട്ട അവസാന നിമിഷങ്ങളിൽ അർജന്റീനയുടെ ലോകകപ്പ് നേട്ടം മുൻനിർത്തി ഡിപോൾ നടത്തിയ പരിഹാസവും അതിനെ പുച്ഛിച്ചു ചിരിച്ചുതള്ളിയ ലെവൻഡോസ്കിയുടെ ഭാവവുമാണ് ഇപ്പോൾ ഫുട്ബോൾ ലോകത്ത് വലിയ ചർച്ചയായിരിക്കുന്നത്.
ചിക്കാഗോയുടെ തട്ടകമായ സോൾജിയർ ഫീൽഡിൽ നടന്ന മത്സരത്തിൽ പത്താം മിനിറ്റിൽ തന്നെ ലെവൻഡോസ്കി നേടിയ ഗോളിലൂടെ ആതിഥേയർ മുന്നിലെത്തിയിരുന്നു. എന്നാൽ രണ്ടാം പകുതിയിൽ കസെമിറോയിലൂടെ ഇന്റർ മിയാമി സമനില പിടിച്ചെടുത്തു. മത്സരം 1-1 എന്ന നിലയിൽ തുല്യതയിൽ നിൽക്കെ, 89-ാം മിനിറ്റിലാണ് നാടകീയ രംഗങ്ങളുടെ തുടക്കം. പെനാൽറ്റി ബോക്സിനുള്ളിൽ വെച്ച് മിയാമി ഡിഫെൻഡർ ഇയാൻ ഫ്രേയുമായി ലെവൻഡോസ്കി വാക്കുതർക്കത്തിലും ഉന്തും തള്ളിലുമേർപ്പെട്ടു. ഇത് കണ്ടയുടൻ ഫ്രേയെ പ്രതിരോധിക്കാൻ ആക്രോശത്തോടെ ഓടിയെത്തിയ റോഡ്രിഗോ ഡിപോൾ ലെവൻഡോസ്കിയുടെ നെഞ്ചിൽ ശക്തിയായി തള്ളുകയായിരുന്നു.
റഫറിയും ഇരുടീമുകളിലെയും സഹതാരങ്ങളും ചേർന്ന് പിടിച്ചുമാറ്റാൻ ശ്രമിക്കുന്നതിനിടെയാണ് ഖത്തർ ലോകകപ്പിലെ ലയണൽ മെസ്സിയുടെ പ്രശസ്തമായ ഡയലോഗിനെ അനുസ്മരിപ്പിക്കുന്ന വിധത്തിൽ ഡിപോൾ ലെവൻഡോസ്കിയെ പരിഹസിച്ചത്. “ആരാടാ നീ, വിഡ്ഢി?! ഞാൻ രണ്ട് കോപ്പ അമേരിക്കയും ഒരു ലോകകപ്പും നേടിയവനാണ്; നീ എന്താണ് നേടിയത്?” എന്നായിരുന്നു ഡിപോളിന്റെ രോഷാകുലമായ ചോദ്യം.
എന്നാൽ ഡിപോളിന്റെ ഈ അതിരുകടന്ന അഹങ്കാരപ്രകടനത്തിന് മുന്നിൽ ഒട്ടും പ്രകോപിതനാവാതെ, അർത്ഥഗർഭമായ ഒരു പരിഹാസച്ചിരി മാത്രമാണ് ലെവൻഡോസ്കി മറുപടിയായി നൽകിയത്. കരിയറിൽ യുവേഫ ചാമ്പ്യൻസ് ലീഗ്, പത്ത് ബുണ്ടസ്ലിഗ കിരീടങ്ങൾ, ലാലിഗ എന്നിവയുൾപ്പെടെ ഇരുപത്തഞ്ചിലധികം പ്രധാന ട്രോഫികളും വ്യക്തിഗത നേട്ടങ്ങളും വാരിക്കൂട്ടിയ എക്കാലത്തെയും മികച്ച സ്ട്രൈക്കർമാരിലൊരാളോട്, ദേശീയ ടീമിന്റെ കിരീടങ്ങൾ മാത്രം ഉയർത്തിക്കാട്ടി വെല്ലുവിളിച്ച ഡിപോളിന്റെ നീക്കം വലിയ ട്രോളുകൾക്കാണ് സോഷ്യൽ മീഡിയയിൽ വഴിവെച്ചിരിക്കുന്നത്.
അതേസമയം 33 ട്രോഫിയും 2 യൂറോപ്യൻ ഗോൾഡൻ ബൂട്ടും 2 ഫിഫ ദ ബെസ്റ്റ് അവാർഡുകളുമുള്ള ലെവയോടാണ് ഡിപോളിൻ്റെ വെല്ലുവിളിയെന്ന രീതിയിൽ ഫുട്ബോൾ പ്രേമികൾ വലിയ വിമർശനങ്ങൾ നടത്തുന്നുണ്ട്.
DE PAUL VS LEWANDOWSKI. 🇦🇷🤬🇵🇱 pic.twitter.com/HmfIg1B8iN
— Sudanalytics (@sudanalytics_) September 10, 2026
Content Highlights:
Robert Lewandowski and Rodrigo De Paul engaged in a fierce on-field argument during an MLS match between Chicago and Inter Miami. De Paul taunted the Polish star regarding international trophies, but Lewandowski casually brushed it off with a smile. The dramatic incident has sparked massive reactions across social media platforms.




