ബയേൺ മ്യൂണിക്കിന്റെ ഫ്രഞ്ച് യുവവിങ്ങർ മൈക്കിൾ ഒലിസെ യൂറോപ്യൻ ഫുട്ബോളിൽ വിസ്മയക്കുതിപ്പ് തുടരുന്നു. മത്സരത്തിൽ തകർപ്പൻ ഹാട്രിക്കും ഒരു അസിസ്റ്റുമായി കളംനിറഞ്ഞ ഒലിസെ, കളിച്ച മത്സരങ്ങളേക്കാൾ കൂടുതൽ ഗോൾ പങ്കാളിത്തം എന്ന അവിശ്വസനീയനേട്ടവും സ്വന്തം പേരിലാക്കി. ഈ സീസണിൽ എല്ലാ ടൂർണമെന്റുകളിലുമായി കളിച്ച ഏഴ് മത്സരങ്ങളിൽ നിന്ന് 11 ഗോൾ ഇൻവോൾവ്മെന്റുകളാണ് താരം ഇതുവരെ സ്വന്തമാക്കിയത്.
കളിക്കളത്തിൽ എതിർപ്രതിരോധങ്ങളെ നിഷ്പ്രഭമാക്കുന്ന ഡ്രിബ്ലിങ്ങും കൃത്യതയാർന്ന ഫിനിഷിങ്ങുമായി ടീമിന്റെ കുതിപ്പിൽ നിർണായക പങ്കുവഹിക്കുന്ന ഒലിസെ നിലവിൽ യൂറോപ്പിലെ ഏറ്റവും ഫോമിലുള്ള കളിക്കാരിൽ ഒരാളാണ്. മുന്നേറ്റനിരയിൽ ഗോളുകൾ നേടുന്നതിനൊപ്പം സഹതാരങ്ങൾക്ക് അവസരങ്ങൾ തുറന്നുനൽകുന്നതിലും താരം കാട്ടുന്ന മികവാണ് ബയേണിന്റെ ആക്രമണങ്ങൾക്ക് മൂർച്ചകൂട്ടുന്നത്.
ഇത്തരമൊരു അസാധാരണ ഫോമിൽ പന്തുതട്ടുന്നതോടെ ഫുട്ബോൾ ലോകത്തെ ഏറ്റവും അഭിമാനകരമായ ബാലൺ ഡി ഓർ പുരസ്കാര ചർച്ചകളിലും ഇരുപത്തിരണ്ടുകാരനായ താരത്തിന്റെ പേര് ഉയർന്നുകേൾക്കാൻ തുടങ്ങിയിട്ടുണ്ട്. സീസണിന്റെ തുടക്കത്തിൽത്തന്നെ കാഴ്ചവെക്കുന്ന ഈ മാന്ത്രികപ്രകടനം ഭാവിയിൽ ഒലിസെയെ ലോകഫുട്ബോളിലെ ഏറ്റവും വലിയ വ്യക്തിഗത പുരസ്കാര വേദിയിലെത്തിക്കുമോയെന്ന ആകാംക്ഷയിലാണ് ഫുട്ബോൾപ്രേമികൾ.
Content Summary
Bayern Munich winger Michael Olise continued his impressive form with a hat-trick and an assist. He has recorded 11 goal involvements in seven matches across all competitions this season, prompting early Ballon d’Or discussions.




