പാരീസ്: തനിക്ക് ബാലൺ ഡി ഓർ പുരസ്കാരം നേടാനായാൽ അത് ആഫ്രിക്കൻ ജനതയ്ക്കായി സമർപ്പിക്കുമെന്ന് ഫ്രഞ്ച് സൂപ്പർ താരം കിലിയൻ എംബാപ്പെ. സ്വന്തം വേരുകളുമായുള്ള ബന്ധം താൻ ഒരിക്കലും കൈവിട്ടിട്ടില്ലെന്നും ആഫ്രിക്കയിൽ ചെല്ലുമ്പോഴെല്ലാം അവിടുത്തെ ജനങ്ങൾ നൽകുന്ന സ്നേഹം വലിയ ആത്മബന്ധമാണ് നൽകുന്നതെന്നും ഫ്രഞ്ച് മാധ്യമമായ ആർ.എഫ്.ഐക്ക് നൽകിയ അഭിമുഖത്തിൽ എംബാപ്പെ വ്യക്തമാക്കി.
“എന്റെ വേരുകളുമായും പൂർവികരുമായുമുള്ള ആത്മബന്ധം ഞാൻ ഒരിക്കലും മറന്നിട്ടില്ല. ഓരോ തവണ ആഫ്രിക്കയിൽ പോകുമ്പോഴും അവിടുത്തെ ജനങ്ങളുടെ അളവറ്റ സ്നേഹം ഞാൻ നേരിട്ടറിയാറുണ്ട്. ആഫ്രിക്കൻ ഭൂഖണ്ഡത്തിൽ നിന്ന് എനിക്ക് എപ്പോഴും വലിയ പിന്തുണയും സ്നേഹവും ലഭിച്ചിട്ടുണ്ട്. അതുകൊണ്ടുതന്നെ ഒരു ബാലൺ ഡി ഓർ സ്വന്തമാക്കാൻ കഴിഞ്ഞാൽ, ഏതെങ്കിലും തരത്തിൽ അത് ആ ജനതയ്ക്കു കൂടി സമർപ്പിക്കണമെന്നാണ് എന്റെ ആഗ്രഹം. വ്യക്തിപരമായി എന്നെ സംബന്ധിച്ച് അതൊരു മനോഹരമായ നിമിഷമായിരിക്കും,”- റയൽ മഡ്രിഡ് താരം പറഞ്ഞു.
കാമറൂൺ വംശജനായ പിതാവിന്റെയും അൾജീരിയൻ വംശജയായ മാതാവിന്റെയും മകനായ എംബാപ്പെ, ഫ്രാൻസിന്റെ ലോകകപ്പ് നേട്ടങ്ങളിൽ നിർണായക പങ്കുവഹിച്ചപ്പോഴും തന്റെ ആഫ്രിക്കൻ പാരമ്പര്യത്തെ നിരന്തരം ഓർമിപ്പിക്കാറുണ്ട്. ഫുട്ബോളിലെ ഏറ്റവും വലിയ വ്യക്തിഗത പുരസ്കാരമായ ബാലൺ ഡി ഓറിനായുള്ള പോരാട്ടത്തിൽ സജീവമായി നിലനിൽക്കുന്നതിനിടെയാണ് ഫ്രഞ്ച് നായകന്റെ ഹൃദയസ്പർശിയായ പ്രതികരണം.
Content Summary
Kylian Mbappe said he would dedicate a potential Ballon d'Or win to the people of Africa. The France captain emphasized that he has never forgotten his roots and spoke about the love and support he receives whenever he visits the continent.






